Бид Монгол улсын хууль, тогтоомж болон компанийн дотоод дүрэм, журмыг үйл ажиллагаандаа баримтлан ажилладаг бөгөөд түүнчлэн бусдаас ямар нэг байдлаар зөрчихийг шаарддаггүй. Үүнтэй холбоотой бид дараах зарчмуудыг баримтлан ажиллах бөгөөд үүгээр хязгаарлагдахгүй.

• Бид хөдөлмөр эрхлэлттэй холбоотой Монгол Улсын хууль тогтоомжийг чанд сахин биелүүлдэг.
• Манай ажилтан бүр хөдөлмөрийн аюулгүй байдалтай холбоотой хууль тогтоомж, дүрэм журам, зааврыг чанд дагаж мөрдөн, өөрийн болон бусдын аюулгүй байдлыг хангаж ажиллах үүрэгтэй.
• Бид ажлын цагаар ажлын байран дээрээ ажлын бүрэн чадвартай байх үүрэгтэй. Бид ажил үүргээ гүйцэтгэхдээ согтууруулах ундаа, мансууруулах бодисын нөлөөнөөс ангид, ажил үүргээ гүйцэтгэх бүрэн чадвартай байх ёстой.
• Бид байгаль орчиндоо ээлтэй байхыг эрхэмлэн, байгаль орчинд үзүүлж болзошгүй сөрөг нөлөөллөөс урьдчилан сэргийлдэг, бууруулдаг, арилгадаг, байгаль орчны холбогдолтой хууль тогтоомжийг мөрдөж ажилладаг.
• Бид хамтран ажилладаг харилцагч, гүйцэтгэгч, бэлтгэн нийлүүлэгч болон холбогдох бусад этгээдээс манай аюулгүй ажиллагаа, эрүүл мэнд, байгаль орчны шаардлагыг хүндэтгэж, сахин мөрдөхийг хүсэн хүлээдэг.
• Зөвхөн хууль ёсны бизнесийн хэрэгцээ гарсан, эсхүл хуулийн дагуу шаардсан тохиолдолд л хүний хувийн мэдээллийг бусадтай хуваалцдаг ба энэ тохиолдолд мэдээллийн нууцлалд тавигдах шаардлага, хэм хэмжээг тодорхой болгож өгдөг.
• Бид зах зээл дээр шударга, ёс зүйтэй өрсөлдөж, шударга өрсөлдөөний тухай холбогдох хууль тогтоомжийг хүндэтгэн ажилладаг.
• Бид харилцагч, гүйцэтгэгч, бэлтгэн нийлүүлэгчдэдээ ижил тэгш боломж, бололцоо олгодог, худалдан авалт, тендерийн үйл ажиллагааг холбогдох дүрэм журмын дагуу шударга явуулдаг, бизнесийн нууцыг нь бусдад задруулдаггүй.
• Компанийн хувьд бид улс төрд оролцдоггүй, Монгол Улсын хууль тогтоомжоос гадуур аль нэг улс төрч, улс төрийн хүчинд хандив өгдөггүй.
• Бид компанийн бизнесийн дотоод мэдээллийг бусад хүмүүстэй, тэр дундаа гэр бүл, найз нөхөдтэйгөө хуваалцдаггүй.
• Албан бичиг, санхүүгийн болон бусад баримт, тайлан мэдээг хуурамчаар үйлдэхийг хориглодог.